BAO SIETENGETENG, PORHAIL NA TIGOR

Adong ma najolo sada halak panopa, na morgoar Sanggarsomalindang Panopasomalate na mangoli boru Tompul Sipurpuron boru Limbong Sagala. Ia ditubuhon ma sada anak jadi dibahen ma goarna Bao Sietengeteng. Dung hira sandangan podang daging ni Bao Sietengeteng mate ma Sanggarsomalindang Panopasomalate. Jadi Morsiakbagi ma pangkilalaan ni boru Tompur Sipurpuron pagodanggodang anakna i; ai so manang adong arta ditadinghon Sanggarsomalindang manang hauma sigatsigatonnasida.
Sian maor ni roha ni boruboru i laho ma ibana sahali tu bona ni bulu mandiori tubis, jadi jumpangsa ma godang tubis. Dung i diboan ma i tu huta, dirisi ma i, asa gadisonna tu onan. Jadi sai ganup ari ma boru Tompul i laho tu bona nu bulu i mandiordiori tubis gadisonna asa adong hangoluannasida.. Dung lam magodang daging ni Bao Sietengeteng disuru inana ma ibana manghail anggiat sai adong hangoluannasida, ala na soadong be tubis pabuatbuatonna tau gadisonna. Jadi didok dakdanahi ma tu hatana tu inana i, “Ale inang disuru ho ma ahun manghail, nadenggan do i. Alai siandia ma buatongku nuaeng hepeng manuhor jojoran sanjongkal? Ai so manang adong hepeng tapeop? On pe ale inang, ia naeng ulahononhu panghailon, denggan ma ho jolo laho madangadang tu bona ni bulu i mandiori tubis, ia dung adong jumpang ho, irisi ma denggandenggan songon nasailaon jala boan ma i tu onan. Songon i ma tumbanghon tubis na dapot ho i tu jojoran sanjongkal, dung i boan ma jojoran i tu son asa hupauli bahen hail.”
“Denggan,” ninna natorasna i, dung i laho ma inana tu bona ni bulu mandiori tubis, jadi jumpangsa ma godang tubis. Dung jumpang mata ni onan, diboan boru Tompul ma tubis na niluluanna i asa gadisonna tu portigatiga jojoran. Dung diida portigatiga jojoran tubis na hinunti ni boru Tompul i, disungkun ma argana asa tuhoronna. Jadi didok boru Tompul i ma, “Gabur do arga ni i ale amang. Sae do holan jojoran sanjongkal bahenonmu panuhor tubishon.” Burju roha ni potigatiga i, digotap ma jojoranna i jala dilehon tu boruboru i. Dung dijalo boru Tompul jojoran tohor ni tubisna i, muli ma ibana jala dilehon ma i tu anakna.
Asa dung dijalo Bao Sietengeteng jojojran i sian inana, sai dipatigor ma jojoranna i. Dung tigor, dirahuti ma jojoran i dos tonga. Mornida i boru Tompul, disurahi ma hapandean ni anakna i, songonon ma didok, “Pengkuk do hail da amang asa dapotan, anggo tigor ndang hasea,” ninna. Alai dialusi anakna i ma hata i, “Ndada holan uhum hasea tigor ale inang, manang aha pe sibuaton ingkon mardongan tigor do asa ture. “ Jadi sip ma natorasna ipaidaida hapandean ni anakna i.
Dung sun dipauli Bao Sietengeteng hailna na tigor ilaho ma ibana manghail alai ndang dapotan. Sai didatdati na manghail i dibagasan tolu ari, laos so dapotan, dengke pe ndang adong manoro hailna i. Tole borngin ni mata ni onan i laho ma ibana manghail, jadi ro ma dengke apala nabolon, dibondut ma hailna i barat, jadi dapotsa ma dengke i dung i diboan ma tu inana. Las situtu ma roha ni boru Tompul i mida balga ni dengke i. Asa dung laho poronan, didokkon inana ma boanon ni anakna dengke na balga i asa gadisonna, didok ma, Gadis damang ma dengke on, alai ndada jadi hepeng jaloonmu tuhorna, sae do ende sada jaloonmu sian panuhor i.
Jadi didok dakdanaki ma, “Molo i do ale inang na mambahen adong hangoluan, denggan,” ninna. Diporsan ma dengkena i, diboan ma tu onan. Ndang sadia leleng nari dipaima, ro ma poronan ni hasundutan, ditopot ma pordengkean i; ai naeng masidengke na bolon ibana pasauthon ulpuk ni datuna. Dung diida dengke nabolon na pinaadopadop ni Bao Sietengeteng i, disungkun ma argana. “Sadia arga ni dengkemon, ale amang pordengke?” Dung i didok ma mangalusi, “Na gabur do arga ni dengke i, ai i do panonai ni dainang nasogot tu ahu.”
Jadi longang ma halak hasundutan i umbege pangidoan ni pordengke i ala na so dung hea masa na songon i diida dibahen halak. Jadi dirimpu rohana ma manang na mandok beha dakdanaki tu ibana.
Jadi didok Bao Sietengeteng ma, “Unang ma pola longang roham di hatangki, burjungku do i. Nuaeng pe, molo dipodahonho di ahu sada ende, boanonmu ma dengke i tu hutam, horas ma ho manganhon i jala sahat tu ulaonna.”
Dung i didok halak hasundutan i ma, “Antong ende dia ma podahononku di ho asa diahu dengkemi.”
Jadi didok ma mangalusi, “Lomom do manang dia na tubu sian roham sidohononnmu na tau gabe hangoluan di hami tu pudi.”
Dung i ro ma panuhor i, “Beha molo dung hudok annon sada ende na huboto, saut ma boanonku dengkemi sopola mangalehon hepeng ahu?”
Dung i ninna ma mangalusi, “Saut ma boanonmu dengke i tu hutam dung dipodahon ho di ahu sada ende.” Jadi didok panuhor i ma, “Antong masilehonan tangan ma hita tanda paboa na hot hata i.”
Dung i masilehonan tangan ma nasida diadopi jolma na torop i. Morende ma panuhor i songon on, “HURIDAP MA DI BONA NI BAGOT, NUNGA HO HUIDA JALA NUNGA HO TARDAPOT.” Dung tolhas hata ni ende i didok panuhor i, diolophon Bao Sietengeteng ma ende tuhor ni dengkena i. Sian las ni rohana dibuat ma dengke i jala dilehon tu baoa panuhor i huhut ma didok hatana, “Sahat tu ulaonna ma dengkeon bahenonnmu, sahat ma ahu gabe jala mamora pausungusung ende napinodahonmi tu ahu jalasarimatua.”
“I ma tutu,” ninna panuhor i. Diboan ma dengkena i las ma rohana; ai sopola be halaoan ringgit ibana manuhor dengke i. Muli ma dohot Bao Sietengeteng, las ma rohana mamboan ende tuhor ni dengke i jala dipaboa ma tu inana.
Dung lam tang daging ni Bao Sietengeteng, mangulahi ro hata ni inana songon on. “Beha di roham amang? Ua tingkir ma jolo bagot na sinuan ni amam na hinan, atik naung mormata do i jala boi balbalon anggiat adong sian i hangoluanta.” Dungi laho ma ibana tutu tu ladangna, diida ma bagot i nunga tutu mormata jala nunga tarbalbal.
“Anggiat tung moraek,” ninna rohana, gabe dibalbal ma bagot na i. Andorang di na mambalbal bagot na i Bao Sietengeteng, diehet pamanganna ma ende tuhor ni dengkena i. Jadi andorang di na morende i bana mamolus ma panangko ni hasundutan sampuludua halak na sorat be mangusung na tinangkona.
Dung dibege na sampuludua halah i ende ni pambalbal i, tarngongong ma nasida huthut ma dijouhon soarana, “Sombangku ma di ho amang pambalbal! Nunga tutu taroto hami; ai nunga didida jala didapot ho hami. Nuaeng pe, asal ma unang dipaboa ho hami tu porugasan i, na hian upam!” ninna panangko i.
Umbege soara i bao sietengeteng, songgot ma rohana: ai so pamotoanna panangko i mamolus sian bona ni bagotna i. Alai agan pe so diida hian i, laos hatana i ma didapothon padapot panangko i, ninna ma, “Nunga tutu taroto hamu! Ai luhut ugasan na binoanmuna on, ugasan ni datulang do i hutanda. On pe tung na so tarbahen hamu malu, ingkon tangkupon ma hamu jala pambeangkonon tu huta!” Humalaput ma ibana mijur huhut manjoujou donganna pambalbal, mambahen pitonggam.
Umbege joujou i panangko i, morbubur ma nasida mangkaporushon dirina masitondong tondongonna, so diboto be samban maporus ala biarna; ditadingkon ma ugasan tinangkona i di bona ni bagot i. Mornida i Bao Sietengeteng humalaput ma ibana papunguhon barang na tading ijala dipantabunihon ma tu ramba i. Dung i muli ma ibana, dipaboa ma ugasan na dapotsa i tu inana. Ditangitangi ma huhut usouso ni halak di luatnasida i; alai dung soadong be dibege usouso di busnasida i, dibuat nasida ma poti i, jadi jumpangsa ma godang arta. Ima dipangke Bao Sietengeteng manuhor hauma, bagas dohot bahen pangolina. Jadi sonang ma panghilalaannasida di hangoluan on.