BORU TOMPUL SIPURPURON DOHOT IMBANGNA

Adong ma najolo sada raja natarbarita, namargoar Motua Rajadoli, nammbahen onom jolmana. Dung nania lelengni porsaripeonnasida i, laos so olo do mananggalbajubaju sian jolmana na onom halah i, marsak ma rohana, ai nalaho punu ma ibana dirohana, so tumadingkon anak di tano on. Alai dipahundul raja i ma datu manungkunhon tu nasida manang dia do sibahenonna mangeleheleh Debata asa tubu anak dohot boru dongan sarimatua. Jadi mormanuk ma nasida; ai pormanuhon dodihaposi rohana. Dipeakhon ma sosona, asa manang dia sian angka soso i na nidompakhon ni manuk marbobo, i ma saut siulahonon ni suhut i. Jadi didompakhon manuk i ma soso namandok: “Ingkon mangulahi mangoli raja i, asa tubu anak donagan sarimatua.”
Jadi didok raja i ma, “Unang so i da na mambahen adong di ahu anak sipahedokhedohonku, denggan,” ninna. Jadi mangoli ma ibana, dioli ma sada boruboru ima boru Tompul Sipurpuron, boru Mombang Siagian. Ndang pola sadia lelengnai ditua Debata ma na tama di boru Tompul i. Mornida i imbang ni boru Tompul si onom halah i, sega ma rohanasida. Diluluinasida ma dalan manang songon dia behenon angkal mamunu boru Tompul naung gabegabean i. Ai molo tubu sogot na di bortian, ndang tarpaidaidanasida ibana sogot padidengdideng anak.
Jadi di na sadari pauli sopo ma raja i, jadi disuru ma luhut jolmana na pitu i tu tombak laho masibasbason bahen tarup ni sopo i. Pungu ma anggo na onom halah sapangulaan asa tarbahennasida mortuptup, pasauthon tahi ni rohana mangago boru Tompul i. Dung dos tahinasida disibahenonna, morsitallik siboanonna be ma nasida asa muli. Dung sae siboanonnasida be, morsijouan ma nasida asa udur muli, dijou ma dohot boru Tompul i. Asa dung sangombas nasida mordalan, maradian ma nasida di atas ni sampuran maridi. Andorang na maridi i dope nasida, disoronasida ma boru Tompul i, dung i didabu ma ibana tu sampuran i asa mate. Dung i muli ma anggo na onom halah i. Dung bot ari, dipausoi raja i ma jolmana sionom halah i taringot tu langka ni boru Tompul i, manang na tudia ibana laho. Sada ma alusnasida mandok, “Ndang hubotohami manang tudia ibana; ai jumolo do ibana muli sian hami,” ninna nasida be. Jadi morseto ma roha ni raja i; ai diarop rohana ma, sandok naung mate do boru Tompul dibununasida. Ala ni i mangandung ma ibana sian tos ni rohana, ndang olo be ibana apulonnasida.
Alai anggo boruboru na niaup ondeng, sangkot ma ibana tu sada batu nabolon na ditongatonga ni batang aeh i. Jadi diunsalhon galumbang ni aeh i ma ibana tu ginjangna, laos dihundulhon ma dirina tu ginjang ni batu i. Alai dung humosa ibana di atas ni batu i, dibereng matana ma aek na bagas do hape na manghaliangi ibana. Jadi marsak ma ibana, ai soadong be dalanna laho taripar tu bariba. Dibagasan bojok dohot ponjot ni rohana i joujou ma ibana tu Debata, asa dipatuduhon tu ibana dalan hangoluan; ai na laho mate nama ibana di rohana molo tung laos di tongatonga ni aeh i ibana. Morasi ma tutu roha ni Debata mida boru Tompul i, diaup aeh i ma sada hau nabolon sian julu agan pe somagodang aeh i, jala dipasamban hau i ma dirina tongon tu batu inganan ni boru i, jala ujung ni hau i sahat tu topi ni gadu na di bariba. Jadi hau i ma diporhite boruboru i tu bariba. Dung sahat ibana ro di bariba, mangulahi mangandung ma boru Tompul; ai so adong be diboto dalan tondongonna; tole panganon soada. Ala ni i menjururjurur ma ibana di topi ni aeh i mangalului pahu asa adong hangoluanna. Dung bot ari manaili ma ibana dompak dolok, jadi dapot matana ma disi sada liang, jadi disi nama ibana mormalammalam. Dung nania lelep ni ari diingani boru Tompul liang na di bona ni doloh i, tubu ma na dibortian, baoa. Mangulahi tarsunggul ma disi arsak ni rohana; ai soadong be namambuat soban pansusuduanna, tole panganon so adong memehononna tu dakdanahi. Ala ni i sai laho ma boru Tompul masi pahu tu topi ni aeh i asa adong panganonna dohot panganon ni anakna i. Jadi digoargoar boru Tompul ma anakna i, dibahen ma goarna Si Lundunipahu, ala magodang dakdanahi pinagodanggodang ni pahu, asa goar tulut do i. Dung lam magodang daging ni dakdanah i, ro ma sahali hatana tu iana songon on, “Ale inang! Leleng ma naung taingani ladang on. Didia do damang? Naung mate do ibana, umbahen na so hea ro?”
Umbege i boru Tompul tangis ma ibana, pola leleng asa dialusi anakna i. Dung i diulahi dakdanahi ma muse mandok hata, “Boasa ilum dohot tangismu behenonmu mangalusi, ale inang? Na so morama do ahu? Paboa!”
Dung i ro ma inana i, diumma ma anakna i huhut ma didok, “Pos ma roha ni damang, pir ma tondim sai mangolu maho dipasupasu Ompunta Debata! Sai na botoonmu do i sogot, asal ma hipashipas hita!”
Alai ndang sonang roha ni dakdanah i, sai didatdati do manungkun inana i, saleleng so tangkas diboto hatorangan ni na sinungkunna i. Ndang tarjua boru Tompul i be so paoboaonna na sinungkun ni anakna i. Jadi dipajojor ma tu anakna i porsorionna. Dung torang sude dipajojor boru Tompul i pangalaho ni porsorionna di pambahen ni imbangna si onom halah i, didok ma muse ujung ni hatana, “Pos ma roha ni damang, jala pir ma tondim! Natangkas do damang morama morina. Molo adong asi ni roha ni Debata di ho, sai patuduhononna do tu ho sogot dalan hangoluan.” Jadi sip ma anakna i.
Dung lam magodang daging ni Si Lundunipahu, nunga matoras dohot rohana ditadingkon ma natorasna i di liang i, laho ma ibana mangalului amana Mortua Rajadoli. Jadi holsoan ma roha ni inana taringot tu anak na i. Alai andorang na mordalan i Si Lundunipahu dompak julu paihutihut gadu ni batang aeh i, pajumpang ma ibana dohot onom halak pormahan, toho pormahanmahan ni amana Mortua Rajadoli.
Jadi dihundulhon Si Lundunipahu ma dirina manghatahatai dohot pormahan i. Alai dung na sadia leleng nasida na mangkatai i, tole ma nasida morjuji. Dihamonanghon Si Lundunipahu ma horbo na pinormahanni na sahalah. Alai ala holan Si Lundunipahu do disi, gogo ma dibahen si onom halah i tu ibana; Horbo hian hamonanganna gabe indahan digararhon. Derem do roha ni Si Lundunipahu manjalo indahan i, ai beha ma pangalo ni na sahalak di na onom halak? Dung i muli ma ibana mamboan indahan i tu inana asa adong hangoluanna.
Torang ari marsogotna i, didapothon Si Lundunipahu ma muse pormahan na onom halah i, mangulahi morjuji nasida. Jadi dihamonanghon ibana ma pinormahan ni na dua halak nari. Ditunggu Si Lundunipahu ma hamonanganna i, gabe ulos digararhon. Muli ma ibana, diboan ma ulos i jala dilehon ma tu inana asa adong paheanna. Marsogotna i didapothon ma muse pormahan i mangulahi morjuji nasida. Jadi dihamonanghon ibana ma luhut na pinormahan ni na onom halah i. Dapot ma dohot dagingnasida rodi paheanna. Dung bot ari didok Ssi Lundunipahu ma hatana tu nasida, “Beta hamu, laho ma hita tu hutanami! Olati hamu ma luhut na pinormahanmunaon!”
Jadi didok na onom halah i ma, “Ndang tarjua, ale rajanami; muli ma ho jolo, antong morsogot pe ho ro tuson mangalap hami,” ninna. Burju roha ni Si Lundunipahu, dioloi ma janjinasida i jadi muli ma ibana. Dipaboa ma hamonanganna i tu inana na morsiakbagi i. Alai anggo si onom halah ondeng muli ma nasida mandersederse jala dipaboama hataluannasida i tu donganna magodang, ala na mabiar nasida paboahon tu raja i hamagoannasida i.
Alai anggo pormahan sionom halah i dilului nasida ma dalan patunduk Si Lundunipahu. Songon on ma tahinasida. Molo ro morsogot Si Lundunipahu mangalap horbo hamonanganna i, gogo ma tabahen! Taboan hian ma tali pansa on! Disi ro ibana, pintor tatali ma ibana jala taboan tu huta. Dung i tabeanghon ma tu bonggarbonggar ni bagas ni raja i. Ia disungkun raja i hita, tadok ma alusta,” Najumpang hami do bayo on naeng mamangus na hupormahanhami; ido alana umbahen tinangkup ibana jala bineangkon.” I ma tadok. Jadi malua na itapormahani i, mago ma anggo ibana.
Asa dung torang ari morsogotna i, dipatulanasida ma na pinormahanna i. Dung ro di jampalan si onom halah i, ndang pola piga dan nari ro ma Si Lundunipahu morningot padanna. Alai dung ro di adaran ibana pintor disoro sionom halah i ma ibana, ditali ma ibana jala diboan tu huta. Dung i pintor dibeangkon ma ibana tu bonggarbonggar ni bagas ni raja i. Dipajojornasida mahuhut tu raja i dalan pambuatna di bayo i. Didok, “Na naeng mamangus ibana umbahen natinangkup.”
Dung ro di beangan Si Lundunipahu, mangandung ma ibana songon on, “Ngalutnai ale Ompung Debata porniahapankon! Sai asi ma roham di ahu, sai tatap ma ahu on! Burjuni rohangku do morningot padanhu, hape gabe burjungki do jumadi hamagoan di ahu, ai tardobo ahu songon on dibagasan na soada utang, soada dosa. Dibuat godung ahu na so marhinambor; dibuat basir naso morsipatudu. Asa tangi, bege i ale Ompung Debata! Sai patuduhon ma di ahue dalan hangoluan!” Sai songoni ma diandunghon di na sadari i. Tole padua arihon mangulahi mangandung ma ibana di beanganna i, diandunghon ma disi bernit ni porniahapan ni inana ala pambahenni imbangna si onom halah i, i ma jolma ni halak Mortua Rajadoli; boti rodi porniahapannasida na di liang i, sahat tu porsorion na niaahapna dung magodang ibana pambahenni si onom halah i.
Dibege sahalak natuatua nahundul di jolo ruma i ma andungandung ni baoa na tarbeang i, jadi maniara ma rohana umbege dangolna. Ala ni i ditopot boru natuatua ondeng ma raja i, nahundul di horbangan i morportungkoan tu balian. Dipajojor natuatua i ma tu pinggol ni raja i andung ni na tarbeang i, porsorion ni inana boru Tompul Sipurpuron i di pangaup ni imbangna sionom halah i, i ma jolma ni Mortua Rajadoli. “Asa anakmu do i ale rajanami, ai ho do dilului.”
Umbege i raja i tarsonggot ma rohana, didok ma, “Nda nunga leleng dung mate boru Tompul? Ndang mangolu be anggo ibana. Alai alani hatami dohot nama ahu morsogot mananginangi andungna i, asa torang binoto pangalahona.”
Morsogotna i hundul ma raja i di porlakna. Dung salpu porbalian, mangulahi mangandungi ma Si Lundunipahu di beanganna i. Jadi toho ma diandunghon ibana songon na pinajojor ni boru natuatua i tu pinggol ni raja i. Dung dibege raja i hatorangan ni andung ni baoa i perek iluna umbege parirna jala diparhatopot rohana ma tutu do i anakna. Ala ni i manaek ma raja i tu bonggarbonggar i, dihaol ma dakdanaki jala diumma, ditanggal ma dohot patna sian beangan i, tangis ma raja i mandok hatana, “Ahu do amangmu Mortua Rajadoli na niluluanmi dibagasan andungmu. Beha, mangolu dope inangmu?”
Umbege i Si Lundunipahu, tarsonggot ma rohana. “Pir ma tondim; ai na pinatongon ni Debata do langkam uson morhite sian haporsuhon na niahap mi. Onpe, didia do inangmu asa taalap nuaeng?” Maol situtu do roha ni Si Lundunipahu porsea di hata i ala songon na mabalgahu barita i di rohana. Dung pe lam tapettapet dipatorang raja i pangalaho ni inana asa porsea ibana jala marhatopothon na tutu do raja i amana, na niangkupanna mangkatai i.
Laos di na sadari i ma borhat raja i dohot Si Lundunipahu mangalap boru Tompul sain liang i mamboan ibana tu huta. Alai manjua do boru Tompul i boanonna tu huta. Sasleleng so diolo raja i pinangido ni rohana. On ma didok,” Molo naeng ahu boanonmu tu huta, ingkon behenonmu jolmam sionom i bahen sidegean ni pat ni anakhon laho tu bagas dohot laho mijur. Anggo so in, sumonang ma ahu mangingani lianglianghon.” Asal olo nama boru Tompul i muli, dioloi raja i ma pangidoanna i. Jadi muli ma nasida.
Dung ro di huta, diharoani raja i ma anakna i jala dibahen masongon na pinangido ni roha ni boru Tompul, dipanjangginghon ma jolmana na onom i tu tangga ni bagasna i, laos mate morsingkor ma na onom halah i di tangga i.