OMPU RAJA NADUNGO

Adong ma nasaingan sada raja na sangap, na morgoar Ompu Raja Nadungo. Ndang adong manang ise na hum mandok beha sian na ginomgomanna i tu ibana hinorhon ni sangapna. Na risik situtu do raja i mamatahon pangalaho na masa di ruar ni gomgomanna i. Sai morsurasura do rohana di hasosonggop ni jea sibahenon ni halak tu liat gomgomanna i. Ala ni i, nang pe peak dagingna di lage podomanna, tinggil do pinggolna, rohana pe sai tong do dungo.
Dung i di borngin na so panagamon, di serep ni mata dina tonga borngin i, manghuling ma sulambak golanggolang di lambung ni pintu rea na bolon i. Alai dung dibege raja i panganggis ni sulambah i, tarsonggot ma rohana, ndang tarnono be matana sahat rodi tiur ni ari mamingkiri manang dia do alana umbahen na olo ibana patubegehon soarana dina tonga borngin i. Dung torang ari sogot manogot i hehe ma raja i sian podomanna jala mijur ibana tu toru, laos dihundulhon ma dirina di jolo rumana i paima mijur halak sude tu toru.
Dung morrungharan angka jolma i sian bagasna be dijoui ma nasida ganup asa ro morpungu tu jolona. Ai naeng sunghunonna nasida manang na dohot do nasida umbege soara ni sulambah i napatubegehon soarana dina tonga borngin i. Dung pungu natorop di jolo ni raja i, disunghun raja i ma nasida, didokma jumolo tu porjabutongatonga i, “Beha do ia ho ale porjabutongatonga, dibege ho do soara naborngin?”
Jadi ninna ma mangalusi, “Iale rajanami, tarpodom do ahu naborngin ala na malojahu dihilala daginghu sadari nantoari; huida duru ni haumanghu nunga tubuan sanggar tole batangi ni hauma i nunga tubuan oma dohot duhut simorampangampang. Lilian patureturehon i ahu dirempe ma huhilala na saborngin on laos tarpodom, umbahen so hubege.”
Dung muntul raja i sian porjabutongatonga, didok muse ma tu porjabuduru i, ‘’Ba ia ho ale porjabuduru, dibege ho do soara naborngin?” Jadi didok ma mangalusi, “Ahu pe, ale rajanami, ndatung adong hubege alimot ni soara i. Alana ; huida nantoari gadongnami nunga disoluk ri dohot arsam jala duruna i nunga tubuan sanggar. Lilian mangaronghati sangar i ahu dohot manarbuti ri na di gadong i tung derem do dihilala daginghu saborngin on, ndang humusor laos so hubege.”
“Ba ia hamu ale amang tamue sitolu halah, na modom di tarisopo na dilambung ni pintu rea i, dibege hamu do soara naborngin?”
Dung i ninna ma mangalusi, “Olo rajanami, hubege hami do.” Jadi didok raja i ma, “Antong molo dibege ho hape soara i, aha do i na manghuling i?” Jadi didok ma mangalusi, “Sulambahgolanggolang do i.”
Dung i ninna raja i ma, “antong molo manghuling sisongon i bornginborngin, aha do pinaboani i?” Jadi ro ma alus ni tamue i, “Anggo songon di hami, ale rajanami, molo manghuling sulambahgolangolang bornginborngin, mangalumbahon hasosonggop ni rojan ma i, na songgop tu huta i.”
Jadi didok raja i ma, “Molo masa rojan di bagasan huta, aha do dibahen raja pangobohina asa unang saut ro?”Dung i ninna ma mangalusi, “Anggo na peam naung huulahon hami dibahen rajanami: tinopa ma sagusagu na so targomak begu, i ma tinibalhon di bulung ni antimang.” Dung i ninna raja i ma, “Molo binahen i antong, so do?”
Ro ma alusna, “So do.” Dung sun ditanghasi raja i angka pangalaho i, dipatupa ma di na satonghin i pangobohi ni panghuling ni sulambahgolangolang, asa unang sanga songgop jea na nilumbahon ni soara i.